有日一位小姐嚟到診所。
佢行埋嚟登記處問我：「係咪有醫生喺度呀？」
我：「係呀，你俾身分證我呀，我同你登記呀」
佢：「我見頭暈嘅係唔係低血壓呀？」
我個樣似醫生定似血壓機？你幾時見過軍艦咁大部嘅血壓機？
我：「可以入去見醫生先呀，等醫生同你check呀」
佢：「見頭暈係高定低血壓呀？」
我：「個個人情況都唔同，我答你唔到呀，真係要check咗先，等醫生再幫你呀，你俾身分證我登記就可以啦」
佢：「你用咩同我check呀？」
我：「量血壓嘅都係用血壓機嘅」
佢：「我未用過可唔可以用㗎？」
我：「可以呀，量血壓好普通㗎咋，會有部機泵啲氣咁量，唔駛擔心」
佢終於遞上身分證，我鬆一口氣。
成功登記，成功入到醫生房。
喺佢見醫生期間，我坐喺登記位，聽到佢喺入面嗌『呀呀呀，爆啦爆啦，谷爆啦，停呀停呀』
我望一望佢個名，確定唔係叫雷X欣，唔會玩人體大爆炸，平安。
再聽到佢講『頭先個姑娘話好普通㗎喎，點解唔係好似佢講咁㗎？』
冷靜啲啦女。
隔咗陣醫生房門打開，佢一路行出嚟一路好仇視咁望住我講：「我俾你嚇死呀」
正確嚟講，你係死喺血壓機下。
佢再講：「我隻手爭啲爆呀，我以為自己會骨折呀」
咁又誇張咗。
我：「醫生有冇話你低血壓呀？」
佢：「話我高呀，話我可能太驚呀，要出嚟坐15分鐘呀」
我：「哦～好呀，咁你坐低抖抖呀，15分鐘後再入醫生房量血壓呀」
佢腳步停低：「再量？唔係叫我坐15分鐘咋咩？」
淨坐三計呀。
我：「係坐15分鐘之後再量過呀」
佢冇出聲，慢慢慢慢咁行去門口附近，然後沒有然後了。
診金呀！！
Search